പ്രഭാതഭക്ഷണത്തിനും ജിമ്മിലെ ഡയറ്റിനുമെല്ലാം പുഴുങ്ങിയ മുട്ട പതിവാക്കിയവരാണോ? ഒരുമിച്ച് കുറച്ച് മുട്ടകള്‍ പുഴുങ്ങി ഫ്രിഡ്ജില്‍ സൂക്ഷിക്കുന്ന ശീലമുണ്ടോ?. എങ്കില്‍ മുട്ട എത്ര ദിവസം സുരക്ഷിതമായി കഴിക്കാം?, ഫ്രീസറില്‍ വെക്കാമോ?, എങ്ങനെ സൂക്ഷിക്കണം? തുടങ്ങിയ കാര്യങ്ങള്‍ അറിഞ്ഞിരിക്കണം.
ശരീരത്തിന് പ്രോട്ടീന്‍ ലഭിക്കുന്നതിനുള്ള എളുപ്പവഴികളിലൊന്നാണ് മുട്ട. തിരക്കുള്ള ദിവസങ്ങളില്‍ ഭക്ഷണം തയ്യാറാക്കാനുള്ള സമയം ലാഭിക്കാന്‍ പലരും മുട്ടകള്‍ ഒരുമിച്ച് പുഴുങ്ങിവെക്കാറുണ്ട്. എന്നാല്‍ പുഴുങ്ങിയ മുട്ട പാകം ചെയ്തതുകൊണ്ടുമാത്രം ദീര്‍ഘകാലം കേടാകാതെ ഇരിക്കില്ല. പാകം ചെയ്തശേഷം എങ്ങനെ സൂക്ഷിക്കുന്നു എന്നതും പ്രധാനമാണ്.
അമേരിക്കന്‍ കൃഷിവകുപ്പിന്റെ ഭക്ഷ്യസുരക്ഷാ വിഭാഗമായ USDAയുടെ മാര്‍ഗനിര്‍ദേശപ്രകാരം നന്നായി പുഴുങ്ങിയ മുട്ടകള്‍ ഫ്രിഡ്ജില്‍ സൂക്ഷിച്ചാല്‍ ഒരാഴ്ചവരെ ഉപയോഗിക്കാം. മുട്ടത്തോട് കളയാത്തതും തോട് നീക്കിയതുമായ മുട്ടകള്‍ക്ക് ഈ മാര്‍ഗനിര്‍ദേശം ബാധകമാണ്.
എന്നാല്‍ മുട്ട പുഴുങ്ങിയശേഷം എത്രയും വേഗം തണുപ്പിച്ച് ഫ്രിഡ്ജില്‍ വെക്കണം. മുറിയിലെ സാധാരണ താപനിലയില്‍ രണ്ട് മണിക്കൂറിലധികം വെച്ച മുട്ടകള്‍ പിന്നീട് ഫ്രിഡ്ജില്‍ വെച്ചാലും സുരക്ഷിതമാണെന്ന് ഉറപ്പിക്കാനാവില്ല. അന്തരീക്ഷ താപനില 32 ഡിഗ്രി സെല്‍ഷ്യസിന് മുകളിലാണെങ്കില്‍ ഈ സമയം ഒരു മണിക്കൂറായി കുറയും.
പുഴുങ്ങിയ മുട്ട ഫ്രിഡ്ജില്‍ സൂക്ഷിക്കുമ്പോള്‍ അതിന്റെ തോട് ഉടന്‍ കളയേണ്ടതില്ല. ഉപയോഗിക്കുന്നതിന് തൊട്ടുമുമ്പ് തോട് നീക്കുന്നത് സൗകര്യപ്രദമാണ്. തോട് നീക്കിയ മുട്ട വൃത്തിയുള്ളതും അടച്ചുവയ്ക്കാവുന്നതുമായ പാത്രത്തില്‍ സൂക്ഷിക്കുക.
USDAയുടെ FoodSafety.gov പുറത്തിറക്കിയ ഭക്ഷ്യസംഭരണ മാര്‍ഗനിര്‍ദേശത്തില്‍ പറയുന്നതനുസരിച്ച് പുഴുങ്ങിയ മുട്ട ഫ്രീസറില്‍ സൂക്ഷിക്കുന്നത് അത്ര നന്നല്ല എന്നാണ്. ഇങ്ങനെ ചെയ്യുമ്പോള്‍ മുട്ടയുടെ വെള്ളയ്ക്ക് കട്ടിയുള്ളതും റബ്ബര്‍ പോലുള്ളതുമായ ഘടന ലഭിക്കാനും രുചിയിലും ഗുണനിലവാരത്തിലും മാറ്റമുണ്ടാകാനും സാധ്യതയുണ്ട്. അതിനാല്‍ അടുത്ത ദിവസങ്ങളില്‍ ഉപയോഗിക്കാനുള്ള മുട്ട അപ്പോള്‍ പുഴുങ്ങി ഉപയോഗിക്കുന്നതാണ് നല്ലതെന്ന് പറയുന്നു.
മുട്ടയ്ക്ക് അസാധാരണമായ ദുര്‍ഗന്ധമുണ്ടാകുക, നിറത്തില്‍ അസാധാരണമായ മാറ്റം കാണുക, പുറത്ത് അസ്വാഭാവികമായ ഒട്ടിപ്പിടിത്തം അനുഭവപ്പെടുക തുടങ്ങിയവ ശ്രദ്ധിക്കേണ്ട ലക്ഷണങ്ങളാണ്. ഇത്തരം മാറ്റങ്ങളുണ്ടെങ്കില്‍ മുട്ട കഴിക്കാതിരിക്കുക. എന്നാല്‍ ദുര്‍ഗന്ധമില്ലെന്ന കാരണത്താല്‍ മാത്രം മുട്ട സുരക്ഷിതമാണെന്ന് ഉറപ്പിക്കാനാവില്ല.
മുട്ടയുടെ വെള്ളയും മഞ്ഞക്കരുവും നന്നായി ഉറച്ചുവരുന്നതുവരെ പുഴുങ്ങണം. പാകം ചെയ്യുന്നതിന് മുമ്പും ശേഷവും കൈകളും പാത്രങ്ങളും വൃത്തിയായി സൂക്ഷിക്കുക. പുഴുങ്ങിയ മുട്ട മുറിച്ചശേഷം ദീര്‍ഘനേരം പുറത്തുവെക്കാതെ ഫ്രിഡ്ജില്‍ സൂക്ഷിക്കുക. ഓഫീസിലേക്കോ യാത്രയ്‌ക്കോ കൊണ്ടുപോകുന്നവര്‍ മുട്ട സാധാരണ ബാഗില്‍ മണിക്കൂറുകളോളം വെക്കുന്നത് ഒഴിവാക്കണം. തണുപ്പ് നിലനിര്‍ത്താന്‍ കഴിയുന്ന ഇന്‍സുലേറ്റഡ് ബാഗും ഐസ് പാക്കും ഉപയോഗിക്കുന്നത് നല്ലതാണ്.
Content Highlights :How long do boiled eggs stay good? Things to keep in mind when storing eggs in the refrigerator